उर्लाबारी । गत भदौ २३ र २४ गते भएको जेनजी आन्दोलनपछि हतोत्साहित बनेको उर्लाबारी प्रहरीले पुनः सक्रियता देखाउन थालेको छ । आन्दोलनका क्रममा उत्पन्न तनावपछि केही समय निष्क्रिय बनेको प्रहरी हाल पुनः सशक्त रुपमा मैदानमा उत्रिएको छ ।
आज साँझदेखि प्रहरीले उर्लाबारी–मधुमल्ला सडकखण्डमा सवारी चालकहरूको मादक पदार्थ सेवन (मापसे) परीक्षण सुरु गरेको छ । प्रहरीका अनुसार, नियम विपरीत मापसे गरेर सवारी चलाउने चालकहरूलाई कारबाहीको दायरामा ल्याउने उद्देश्यले विशेष चेकजाँच अभियान सञ्चालन गरिएको हो ।
प्रहरीका निरीक्षक रन्जन बरालका अनुसार सडक दुर्घटना रोकथाम र सुरक्षामा जनविश्वास पुनः स्थापित गर्नका लागि यो अभियान निरन्तर सञ्चालन गरिने छ ।
स्थानीयहरूले पनि लामो समयपछि प्रहरीको सक्रियता देखिएको भन्दै सडक सुरक्षा र कानून पालनामा सकारात्मक प्रभाव पर्ने विश्वास व्यक्त गरेका छन् ।